Deeq bixiyayaasha ayaa qoraal ay wada jir ugu soo direen saddexda xisbi qaran, 27 May, 09, waxa ay ku taxeen shuruudo ay ku xidheen taageerista doorashada madaxtinimada Somaliland . Qoraal ay labada xisbi wada jir shalay ugu direen Mr. Richard Hands, oo madax u ah deeq bixiyayaasha midowga Yurub, ayaa waxa ay ku caddeeyeen inay aqbaleen qodobadaas. Qoraalkaas labada xisbi oo aan saxaafadda loo qaybin, waxa ku saxeexan guddoomiyaha xisbiga UCID Md. Faysal Cali Waraabe iyo ku simaha guddoomiyaha KULMIYE Md. Muuse Biixi Cabdi, waxaanu nuqul ka mid ah oo aanu helnay u qornaa sidan: "Xisbiyada mucaaradka ah ee KULMIYE iyo UCID iyaga oo tixraacaya warqaddaadii ku taariikhaysnayd 27-ka May 2009-ka, Waxa ay si buuxda u aqbaleen qodobbadii iyo shuruuddii warqaddaadaas ku caddaa.
Waxa aanu kugu waafaqsannay in dhammaan shuruudahani ahaayeen kuwo aan cusbayn, maadaama oo  aad si qoto dheer ugaga hadashay kulamo tiro badan oo aynu hore u yeelannay. Dhankayaga waxa aanu aaminsanahay fulinta shuruudahani in ay fududayn doonaan. Doorashooyin madaxtooyo oo xor iyo xalaal ah.
Sida aad adiguba tilmaamtay, barnaamijka dimuqraadiyeynta ee Somaliland runtii waa jid taariikhi ah, dadka Somaliland-na si weyn ayey ugu faraxsan yihiin qaadhaanka qiimaha badan ee deeq bixiyeyaasha oo la'aantii jidka dimuqraadiyaddu aanu sii jiri kareen."

Wargeyska Geeska Afrika www.geeska.net