Tan ayaa loo arkaa inay maanta Madaxweyne Rayaale u xidhay muraayad madoow, maadaama oo aanu jawaab u hayn su’aasha ka taagan halka ay ku dambeeyeen wershadihii uu duleedka Berbera dhagax dhigay sannado ka hor. Madaxweynuhu doorkan wuxuu u baydhay jiho kale, waxaanu mar labaad Berbera ka balanqaaday dib u habaynta iyo ballaadhinta dekedda Berbera.

Madaxweyne Rayaale, waxa safarkiisan Berbera uu ku tagay ku weheliya dad ajaanib ah oo sidii doorkaas hore la sheegay inay yihiin ganacsadeyaal maalgelinaya dekedda Berbera. Xubnaha weftigan Ajanebiga ah ayaa la sheegay inay ka soo jeedaan shirkad laga leeyahay dalka Faransiiska oo lagu magacaabo Africa Logistics. “Waxaanu ka wada hadalnay madaxweynaha Somaliland sidii aanu wax idiin kala qaban lahayn dhismaha dekeda Berbera iyo wadada isku xidha Berbera iyo Itoobiya taas oo ah fursad qaali ah waxaanu nahay shirkad ka shaqeysa 48 dal oo afrikan ah iyo sideed dekedood oo afrika ku yaal kuwaasi oo aanu wax la qabano.” Sidaas waxa yidhi sarkaal weftigan Faransiiska ah watay oo saxaafadda la hadlay markii uu Madaxweynaha la kulmay.

Mar uu ka jawaabayey waqtiga uu mashruucani hirgali karo waxa uu yidhi “waxa noo socda wada hadalada ilaa imika waxaan filayaa in mashruucani qabsoomayo oo dekeda horumarin doono.”  mar uu ka jawaabayey in ay mashaariic kale wadaan waxa uu yidhi “waxaanu hada wadnaa uun Dekeda iyo wadada isku xidha Berbera iyo Itoobiya.”

Ma xuma in dalka laga fuliyo mashaariic horumarineed, laakiin waxa ay dad badani isweydiinayaan farqiga u dhaxayn kara shirkadan iyo shirkadihii ka horeeyay ee sababay in la dhagax dhigo saddex wershadood, balse aan muuqooda iyo magacooda toona dib loo arag. Si kastaba ha ahaate, maadaama shirkadahaas hore sababeen in laga aamin baxo balanqaadyada xukuumadda, haddana taariikhda ayaa muddo kooban inagu horkeeni doonta mashaariicda Berbera ee uu Madaxweyne Rayaale mar labaad u xidhay muraayadda Madoow. Sidoo kale dadweynaha reer Berbera, ayaa isha ku haya safarka Madaxweynaha, waxaanay diirad muuqdheer ku eegayaan ujeedada socdaalkiisa, oo ay xukuumadu ku tilmaantay mid shaqo qaran ah, laakiin ay dad badani u arkaan olole siyaasadeed oo la xidhiidha doorashada madaxtooyada.

Source: www.geeska.net, Wargeyska Geeska Afrika, Hargeysa